कैलालीका दुई किशोर लागुऔषधसहित पुनर्वासमा पक्राउ

पुनर्वास । कैलालीका दुई किशोर लागुऔषधसहित पक्राउ परेका छन्। कञ्चनपुरको पुनर्वास नगरपालिका वडा नम्बर ४ आनन्दबजारबाट उनीहरु पक्राउ परेका हुन्।

सशस्त्र प्रहरी बल नेपाल नम्बर ३५ गण हेडक्वाटर शैलेश्वरी कञ्चनपुर मातहतमा रहेको आपतालबाट खटिएको टोलीले कैलालीको गोदावरी नगरपालिका–१ बस्ने १९ वर्षीय बीरेन्द्र सिंह र गौरीगंगा नगरपालिका–३ बस्ने १८ वर्षीय निर्मल औजीलाई पक्राउ गरेको हो।

उनीमाथि शंका लागेपछि चेकजाँच गर्दा औजीको साथबाट एक ग्राम ब्राउनसुगर बरामद गरिएको सशस्त्र प्रहरीले जनाएको छ।

उनीहरुको साथमा रहेको से २ प २३९१ नम्बरको मोटरसाइकल पनि नियन्त्रण गरिएको छ। थप कारबाहीका लागि उनीहरुलाई ईलाका प्रहरी कार्यालय त्रिभुवनबस्तीमा बुझाइएको छ।